മുറിവ്

ഒരുമിച്ചു ഇഴുകി ചേര്‍ന്നു നില്‍ക്കുന്ന ശരീര കോശങ്ങള്‍ അകലുമ്പോള്‍ മുറിവ് ഉണ്ടാകുന്നു. അല്ല, ഒരുമിച്ചു ചേര്‍ന്നു നില്‍ക്കുന്ന എന്തകന്നാലും അത് മുറിവ് ഉണ്ടാക്കുന്നു. മനസ്സായാലും ശരീരമായാലും. കണ്ണുനീരായി ചോരയും, ചോരയായി കണ്ണുനീരും ഒഴുകുന്നു. മുറിവിന്റെ സന്ദേശവാഹകനാണത്രെ വേദന. ചില മുറിവുകള്‍ ഉണങ്ങുന്നത് ഒരു സുഖമുള്ള വേദനയോടെയാണ്. അതെ, സുഖമുള്ള വേദന. മുറിവുകളില്‍ തലോടിയും തഴുകിയും ഈ വേദന ആസ്വദിക്കപ്പെടുന്നു. ചില മുറിവുകള്‍ക്ക് അസഹ്യമായ വേദനയാണ്. ചില മുറിവുകള്‍ പെട്ടെന്നുണങ്ങുന്നു. ചിലത് പതുക്കെയും. ചിലത് ഉണങ്ങാതെ തന്നെയിരിക്കാം. എന്തു തന്നെയായാലും പാടുകള്‍ അവശേഷിപ്പിക്കാതെ മുറിവുകള്‍ ഉണങ്ങാറില്ല.